Rotevassdalen er eit flott område for skiturar. Løypa går slakt innover dalen, med ein liten, slak bakke opp til turmålet. Det er lett å ta seg fram både for store og små. Denne turen går halvvegs til Rotevassætra og endar ved ein stor stein. Her er det fint å lage ein liten bakke å ha skileik i, kanskje eit hopp, fyre opp bål og kose seg.
Start frå parkeringsplassen på Krøvelseidet, ved grenseskiltet mellom Volda og Ørsta. Det er skilta ved start.
Det er flatt terreng og det passar godt med turski, ev. langrennski. Løypa gir seg sjølv innover dalen. Sjå etter blå merke på trea. På slutten er det ein slak bakke opp til turmålet. Turmålet er ved ein stor stein på toppen av bakken.
Volda skisenter trakkar inn Rotevassdalen når snøtilhøva tillet det. Du må altså rekne med at det ikkje alltid er lagt preparert spor. Men det er flott å lage eigne spor eller gå i andre sine.
Om du lurer på snøtilhøva, kan du sjekke Melshornets venner på Facebook, eller nettsida voldaskisenter.no.
Frå Volda sentrum køyr mot Stryn på E39. I ei rundkøyring like etter Volda Campus Sparebank1 Arena, tek du av til Vikebygda på Vikebygdvegen. Følg denne i knapt 5 km til du kjem til ein parkeringsplass på høgre side av vegen, der Vikebygdvegen møter Krøvelseidet (grensa mellom Volda/Ørsta). Turen startar her, så her kan du parkere. På motsett side av vegen startar løypa til Melshornet. Ved stor utfart, må du kanskje parkere langs vegen. Parker då godt ut til sida.
Køyreskildring
Turdata
GeoJSON
