Litledalssætra frå Fyrde - start v/skulen

Litledalssætra ligg i ein dalkop 380 m.o.h. Dette er ei av mange setrar i Austefjorden som er verdt eit besøk. På setrevollen er der ein fin samlingsplass. Ulike stiar fører til Litledalssætra. Ruta som er omtala her, startar ved skulen. Ein fin familietur.

Start ved parkeringsplassen ved Austefjord skule. Kryss vegen og følg smal grusveg forbi eit par hus/hytter. Det er skilta mot Lisjedalen. I enden av grusvegen går du gjennom ei grind, over ei mark og gjennom ei ny grind. Husk å late att grindene etter deg! Du kjem no inn på stien som du skal følge vidare oppover. Ved (N62° 04.144' E6° 19.608') - 200 m.o.h. - kjem du inn på stien som kjem frå byggefeltet i Fyrde. Her er det skilta til Lisjedalen. Når du nærmar deg sætra, er det eit flott utsiktspunkt (Sprengebakken). Ta deg tid til å nyte utsikta her. Siste stykket mot sætra, flatar det litt av.

Det er nokre våte parti undervegs og litt røter og berg, så det er lurt med gode sko.