Veibergsætra frå Løvoll

Turen til Veibergsætra går på skogsveg og god sti i variert skogterreng. Det er ein fin ettermiddagstur eller kveldstur, og ruta følgjer gamle ferdselsvegar og seterstiar i bygda.

Turen startar frå klubbhuset på Løvoll. God plass til parkering ved kommunevegen tett ved klubbhuset. Følg kommunevegen heimover til Kleiva (mot nord), om lag 800 meter.

Sving av på ein traktorveg mot høgre rett før ein raud garasje. Her er det skilta til Veibergsætra. Du følgjer den gamle bygdevegen nedover Kleivadalen. Normalt passerer du gjennom to grinder før du skal ta av på sti mot høgre (aust). Hugs å late att grindene etter deg. Her går ofte dyr på beite. Der stien tek av til høgre, står det skilt mot Veibergsætra. Kring 50 meter etter denne stistarten kryssar du ein bekk/lita elv med ei ny bru. Etter elvekryssinga skråar stien utover lia mot nordaust. Du går stort sett i variert lauvskog og fin blåbærmark og stien er tydeleg. Nokre hundre meter før setra, kjem det opp ein sti frå venstre (ikkje lett å oppdage han). Dette er den gamle sætreråsa frå Veiberg, og dersom du vil ha ein kort rundtur, kan du gå nedatt her på returen, og svinge nedom utsynspunktet på Kleivahammaren før du går oppatt til Kleiva og vidare til p-plassen på Løvoll.

Det siste stykket fram til setra er nærmast flatt. Du kjem fram til ein open setervoll der det står att eitt sel og ruinane etter eit anna. Posten er plassert på selveggen på det attståande selet.