Torviksætra

Turen til Torviksætra er ein kort, men fin tur med jamn stigning opp til ein gamal sæterstøyl for gardane Torvik og Stigen. Torviksætra er eit ynda turmål som passar godt for barnefamiliar. 

Turen startar ved Ulvestad barneskule. Frå barneskulen følgjer du fylkesveg 652 nordover i 400 meter til du kjem til ein skogsveg som ligg om lag 50 meter ovanfor driftsbygninga til Trio samdrift. Her er det skilta mot Torviksætra og merka med Stikk UT!-skilt. Følg skogsvegen oppover og vidare inn i skogen. I det første krysset tek du til høgre og følgjer skogsvegen opp bratta til den flatar ut. Der skogsvegen flatar ut startar stien som går langs åskammen vidare opp mot sætrestøylen som ligg på 265 moh. På åskammen på veg mot sætrestøylen har ein fin utsikt mot Lid, Berknes, Yksnøy og mot Gurskøya.