Sandviksdalen

Sandviksdalen er ei litt skjult perle: ein skoglaus fjelldal i eit solrikt område. Flott utsikt fremst i dalen og lengst inne eit fiskevatn med veldig fine forhold for å telte. Mange kombinasjonsmuligheiter for avstikkarar og lenger turar. 

Lett start på turen på traktorveg med slak stigning, ca 400m nordover. Der vinklar stien til venstre og går over på ein litt enklare traktorveg som slynger seg oppover. Gammal og krokete furuskog og olivinberg. Skikkeleg hjorteterreng! Etter ca 700m sluttar traktorvegen og går over i ein godt merka og relativt tydeleg sti. Denne følger ein oppover i lia, gjennom bjørkeskog som vert stadig lågare og meir krokete. Oppe på dalmunningen er det heilt skoglaust, og du får flott utsikt over Bjørkedalen, men også heilt sør til Jostedalsbreen og Lodalskåpa. Her kan ein velge å ta turen opp på LisjeTua (893 moh) og alternativt enno lenger bakover mot Bytingstinden. Frå dalmunningen flatar terrenget markert ut innover dalen, og etter ca 200m kjem ein til eit godt kryssingspunkt over elva. Der er det skilta mot Vassendefjellet, men ein kan også gå ca 250m bort på utsiktspunktet som heiter Nausa. Vidare innover i dalen går ein i slak stigning inn til den enorme endemorena som demmer opp vatnet - dette er litt av eit naturfenomen!  Her er det fine grassletter og perfekt å telte kvar ein vil. Det er fisk i vatnet, men den er ganske sky. Anbefaler å gå ein tur rundt vatnet, for inst i botnen er der mange fine små dammar og idyllar. 

Ta av Rv651 i Søre Bjørkedal og køyr Sagelvsvegen 350 m rett vestover. I krysset ved brua startar Laurdalsvegen; denne grusvegen følger du oppover bakkane ca 2,0km. Når du kjem til ei trebru, kan du parkere før eller etter brua. God plass på begge sider av brua. Før brua står det grøne turskilt mot Sandviksdalen, LisjeTua og Vassendefjellet.  Husk bompengar på Laurdalsvegen.