Sandfjellet frå Hornindal skisenter

Denne turen er det ikkje så mange som tek, så her kan du finne urørt snø og få ei flott nedkøyring. Jamn stigning utan veldig bratte parti. Flott utsikt frå toppen!

Denne ruta startar frå parkeringsplassen ved Hornindal skisenter og går via Bruasætra. Ein kan også starte frå Engebø (sjå eigen turomtale). Like bak Bruasætra går det ei bru over elva. Gå over denne og skrå nordaust opp mot Hjortedalssætra til du kjem opp til ei skiløype. Følg denne til høgre/austover og kryss elva nedanfor Hjortedalssætra. Når du har kryssa elva, kan du skråe opp mot Hjortedalssætra, gå mellom hyttene og vidare på skrå i retning toppen, d.v.s. nordleg/nordaustleg retning.  Du kan også ta til høgre opp mot Litledalsvatnet. I 1000 meters høgde ligg den siste sida framfor deg. Slak stigning som gir flott nedkøyring! Følg omtrent same veg tilbake. Etter Hjortedalssætra kan du følge løypa som går ned mot Engebø/skisenteret. Då får du renne eit godt stykke nedover, før du må gå litt motbakke før du er tilbake på parkeringsplassen. Ta av ved skilt "Lysløype, Skisenteret", og om litt opp til høgre rett etter ei bru, så er du straks på parkeringsplassen.

Sjølv om turen er rekna som rimeleg trygg, må du sjølv vurdere snøtilhøva/rasfaren og gjere trygge valg.