Rundtur om Tjønnmyran

Dette er ein rundtur med lite stigning som er godt eigna til både kvardagstrim og søndagsturar, gjerne saman med dei yngste eller eldste i familien. Vi anbefalar ein stopp ved den trivelege gapahuken oppå Tjønnmyran. Der finn ein både klatrejungel, bålplass og toalett. Her er det også sitteplassar til mange rundt bålet.

Du startar å gå frå parkeringa ved gamle Talgø møbelfabrikk. Følg ein gamal kjerreveg opp Falla og forbi Storfossen, og du endar opp på hovudvegen som går til Kårvatn (Dalavegen). Fortsett etter denne til du ser skilt til «Tjønnmyran» (til høgre). Gå opp bakken, og du er komen til lysløypetrasèen oppå Tjønnmyran. Følg lysløypetrasèen utover mot bygda. Du finn turkassa ved enden av lysløypa, straks før du begynner nedturen til bygda att. Du følgjer skogsvegen gjennom hogstfeltet ned til hovudvegen, tek til høgre og går etter vegen tilbake til parkeringa.