Rundtur via Omfløddøra

Dette er allereie ein populær rundtur i sentrale Surnadal, og her kan ein starte nesten kvar som helst på runden. For mange vil det kanskje også vera naturleg å justere traseen slik at ein får ein passe rundtur frå eiga stuedør. Målet for runden er uansett turkassen som frå våren 2021 vil vera å finne på Omfløddøra, midt i elva Surna.

Du vel sjølv kva veg du vil gå runden. Her har vi valt å først gå i retning Øye (Kristiansund) med start på Skei. Da er turen litt over halvgått når du kjem til turkassen på Omfløddøra. Gå ut frå parkeringsplassen ved Coop i retning kommunehuset og følj gangvegen ut frå sentrum, nedover forbi Nordmøre folkehøgskule, over Øye bru og vidare langs riksveg 65. I krysset ved Øye tek du til venstre inn på fylkesveg 328/Hamnesvegen. Gå til du har passert Pipelife og kjem til eit vegkryss der gangvegen sluttar. Her kryssar du vegen og går til venstre inn på fylkesveg 327. Her går du i landlege omgivelsar til du ser Sveen auto på venstre side av vegen. Her svingar du til venstre og går forbi bilforretninga. Du kjem inn på fylkesveg 327  igjen like før brua som går over Surna. Du finn Omfløddøra og turkassen midt i elva Surna. Du må krysse fylkesvegen for å koma ned til turkassen. Herifrå følgjer du fylkesveg 326 vidare rett fram og tilbake til Skei. Det kan vera ganske stor trafikk langs ruta, men berre strekninga frå Syltkrysset til Ørabrua manglar gang- og sykkelbane.