Runde - Runde fyr - Goksøyr

Runde er ei svært populær øy å besøke der den ligg langt ut mot havet og med rikt fugleliv. Runde fyr er også ein attraksjon. Denne ruta har start på Runde, følger kanten i omlag 1,5 km til Lundeura, går vidare opp til Rundebranden, tek ein avstikkar til Runde fyr og endar i Goksøyr. Eit litt anna startpunkt enn dei fleste tek.

Rett etter Rundebrua tek du grusveg til venstre og følger denne omlag 500 m. Du finn turstart ved eit skilt om Runde. Stien går langs steingjerdet, gjennom ei grind og så til venstre rett etter grinda. Den er tydeleg heile vegen. Litt bratt opp til knapt 200 m.o.h. Her flatar det ut og du følger kanten vidare bortover mot der stien kjem opp frå Goksøyr. Flott utsikt heile vegen! Ta gjerne ein avstikkar bort til Lundeura. Lundefuglane kjem flygande inn hit om kvelden, eit flott syn som er verdt å få med seg. Gå vidare bakken opp til Rundebranden. Her er det yrande fugleliv. Frå Rundebranden følger du kanten vidare til du kjem til stidelet der du kan gå ned til Runde fyr. Stien har blitt oppgradert siste åra og er fin å gå sjølv om han er litt bratt. Det er knappe 200 høgdemeter ned og absolutt verdt å ta turen. Husa på Runde fyr vert no nytta av DNT, så her er det mulig å overnatte. Frå Runde fyr går du opp att same veg, og fortsetter på runda når du kjem opp att til stidelet. Her er det kloppar og hellelagt store delar av stien vidare til Goksøyr. 

Det er mange som besøker Runde. For å verne om naturen har det difor blitt gjort ein stor jobb med kloppar og steinsetting av stiar. Bruk desse og følg elles på etablerte stiar.