Nonshaugen frå Rellingsætra

Turen til Nonshaugen passar fint både som ein treningstur på ettermiddag/kveld og som ein søndagstur med familien. Bra stigning opp forbi skihytta på Rellingsetra. Deretter litt mindre stigning. Turen gir flott utsikt i fleire retningar. 

Frå parkeringsplassen på Rellingsetra går du først over setrevollen og passerer mellom dei øvste sela på stølen før du føl ein setreveg/traktorveg eit kort stykke. Du får auge på skihytta oppe på selhaugen, og ved ei lita elv svingar du så til venstre oppover i den gamle slalombakken. Råsa er merka med raude V-ar vidare.

Etter slalombakken vil råsa flate litt ut, før den igjen blir brattare opp mot Kvithaugen. Her er det bjørkeskog og delvis myr eit kort stykke. Du går vidare over tregrensa i dalen mellom Nonshaugen og Middagshesten. I denne dalen kjem du til eit skilt som peikar mot Nonshaugen. Føl dei raude V-ane herifrå; over elva, og vidare opp den siste bakken. Ikkje trakka sti det siste stykket. På Nonshaugen vil du finne posten ved ein liten knaus, med eit elles lett myrlendt terreng omkring. Utsikt mot Norddalsfjorden og utover Storfjorden.

Frå ferjekaia i Eidsdal køyrer du først mot Norddal, ca. 5 km. Ved Nærbutikken tek du til høgre framover i bygda og køyrer i om lag 2 km før du tek til høgre over ei bru. Vegen går vidare oppover til Hatlestad, etter den gamle prestegarden. Du passerer Dyrdalsfossen på vegen. På Hatlestad køyrer du over parkeringsplassen, betaler bomavgift og held fram på den private grusvegen fram til Rellingsetra, i om lag 3 km. Der er avgrensa med plassar til bilar, så køyr gjerne fleire saman, om mogleg.