Muletua Nerlandsøy

Herøy

Oppdatert 16.05.2022

Muletua er vestlegaste fjelltoppen i Herøy utanom Skorpa. God utsikt i alle retningar, vest i havet ser du ut mot Svinøya, mot sør ser du Skorpa, mot søraust ser du dei andre fjella i Herøy og mot nordaust ser du Runde.

Turen startar på høgste punktet på vegen mellom Kvalsvika og Mulevika. Stien går nordvestover i lett terreng mot toppen, der er tillaga med raste/kvileplassar fleire stader langs råsa. Når du er komen nesten halvvegs mot toppen kjem du inn på den gamle torvvegen som gjekk frå Kvalsvika til Mulefjellet.

På toppen står ein restaurert torvskjå og på vegen opp er fleire plassar der det er restar etter gamle torvskjåer og plassar der det har vore spadt torv.

På returen er det mogleg å gå ned over Barmen eller gå torvvegen og i begge tilfella kome ned i Kvalsvika. Det kan også vere fint å avslutte turen med å ta seg eit bad på den flotte sandstranda i Mulevika.

Følg fv 654 til Fosnavåg, derifrå køyrer du fv 5878 over Nerlandsøybrua. Det er skilta turparkering ved gamleskulen i Kvalsvika. Du kan og finne parkering om du kjører til høgre i kryss på Kvalsund og køyrer fv 5880 til Kvalsvika der du tek til venstre mot Mulevika. På høgste punktet på vegen er der en liten parkeringsplass på venstre sida 50 meter før stien startar, parker her. Dersom her ikkje er plass må du køyre til parkeringsplassen som er på enden av vegen 300m etter der stien startar.

Fottur

Grønn

Lengde

1,66 km tur/retur

Stigning

198 m

Tidsbruk

55 min.