Kvidalen og Forhaugstølen

Traktorvegen går heilt opp til stølen som heiter Forhaugstølen. Her har det vore 2 setrer. Du ser dei heilt øvst opp mot skogen. Pr 2021 er den eine prega av tidens tann. Den andre litt lenger opp til venstre er bygd opp igjen og er i tipp topp stand. Forhaugstølen er berre ein av fleire seterstølar i Kvidalen. Gammelkvidalen ligg heilt nede ved elva, lenger sør og inn i dalen. I dag er det berre dei gamle steinmurane som står att der. Det tredje området, Kvidalsstølen, kan du kome til når du går rett att frå Forhaugstølen. Ved den første skarpe svingen på veg ned, går du rett fram. Etter ca 100 meter kjem du til ei opning i skogen. Dette er Kvidalsstølen. Her var det fleire seterbuer, men det er berre 2 bygningar du ser i dag. Men du kan sjå gamle og delvis nedgrodde hustufter. Folket drog til setra med buskapen sin rundt St.hans. Tilsaman kan det ha vore buskap rundt 30-40 dyr i Kvidalen. Alle desse stølsområda var også slåttamark. Høyet vart tørka og lagt i utløer i området. Høyet vart køyrt ned om vinteren med hest og slede.

Norge-serien 10078