Kilstimarkene rundt, Eidsdal

Dette er ein rundtur i eit svært vakkert kulturlandskap der du kan gå innom to sæterstølar og heile seks gamle, nedlagde fjordgardar. Heile området ligg inne i Unesco verdsarven Vestnorsk fjordlandskap. Særprega landskap på Flåna med gammal furuskog.

Turen startar på p-plassen på Kilsti (Gjerdeneset). Du følgjer merka og skilta sti oppover eit myrdrag og inn i open bjørkeskog, før du kryssar ei bru og går siste biten opp til Kilstivatnet. Vidare på god rås rundt vatnet på austsida. Det er omlag 2 km å gå inn til Kilstisætra.Frå setra går råsa bratt oppover mot Kilstiheia, der fyrste stykket i bjørkeskog, men straks du kjem ut av skogen, får du framifrå utsyn!

Turen går vidare over Kilstiheia. Merk at stien svingar av brått mot høgre litt etter høgste punktet på heia. Vidare følgjer du ein rygg nedover mot Verpesdalssætra. Råsa går beint nedover seterstølen i retning mot fjorden, men kan vere litt vanskeleg å finne når det er mykje gras på setervollen. Sjå etter merke og turstikker/pålar. I skogkanten finn du att råsa, og etter nokre hundre meter, kjem du til eit stidele. Her kan du velje ruta ned til Skrenakken. Dette vert ein avstikkar der du må gå ned og oppatt same vegen. Det er omlag 1 kilometer ned til garden, og du kryssar elva frå Kilstiheia på god bru før du går det siste stykket ned til tunet. Når du fyrst kjem hit, bør du òg ta ein tur nedom Storenibba, ei fjelltinge som stikk ut høgt over fjorden - ca. 500 m. nedanfor garden

Frå Skrenakken går du oppatt til det nedste råsdele der det er skilta mot Verpsedalen (og attende over Kilstiheia til Kilsti). Du vel råsa mot Verpesdalen og går over eit myrdrag før du følgjer råsa vidare bratt ned lia mot Verpesdalen. Om du vil ha med deg det nedste tunet, må du vere merksam på råsa som svingar av til venstre og ned til denne garden. Viss ikkje følgjer du hovudråsa beint fram. Ho kjem att ved den miderste garden i Verpesdalen.

Frå nedstegarden går råsa opp til øvstegarden. Her svingar du av opp lia mot vest og går bratt opp til Flåna. Vidare over vakre myrdrag og opp langs ein rygg til foten av Blåhornet. Kortaste vegen til bilen er no å runde rundt Blåhornet. Vil du ha med deg øvste og nedste Ospahjellen, tek du av på rås mot fjorden. Sjå eiga turskildring.