Kilstiheia

Turen til Kilstiheia byr både på eit svært vakkert kulturlandskap og makelaus utsikt over Storfjorden. I tillegg går heile turen inne i Unesco verdsarvområdet Vestnorsk fjordlandskap. Kilstisetra er rekna som ei av dei vakraste setrane på Sunnmøre.

Turen startar på p-plassen på Kilsti (Gjerdeneset). Følg skilta og merka sti direkte opp frå parkeringa over eit myrdrag og opp i spreidd bjørkeskog. Du kryssar over elva frå vatnet på god bru og held fram opp til vatnet langs elva. Råsa tek deg vidare rundt austsida av vatnet og inn til Kilstisetra. Hit er det 2 km i lettgått terreng. 

Frå setra er det bratt stigning oppover til heia. Råsa er god og tydeleg og går fyrste delen i bjørkeskog, før du kjem over skoggrensa på siste del av stigninga. På kring 830-meters høgde vet stigninga slakkare, og du går bakover heia mot nordvest. Turposten ligg heilt nord på heia, like før du startar på nedstigninga til Verpesdalssætra og Skrednakken.

Merk at du kan kombinere denne turen med ein heil rundtur, sjå omtalen av "Kilstimarkene rundt".