Kalkverket på Voksa

Turen frå ferjekaia til Kalkverket går på asfaltert veg, kun siste biten er traktorveg. Kalkverket ligg lunt til i nordavinden med utsikt mot Kvamsøy og Riste i vest. Frå kalkbruddet går der sti over Voksehaugen og ned igjen på sørsida. Derifrå går ein vegen tilbake til ferjekaia.

Kalkbruddet på Voksa ligg heilt på vestsida av Voksa, lunt for nordavinden og med utsikt mot Kvamsøya og Riste. Frå ferjekaia går ein vegen heilt til endes mot vest og fortset eit lite stykke på traktorveg til ein har kalkbruddet på venstre hand. Her har det vore uttak av kalk i tidsromet 1930-1970. Ein reknar med at kalkåra strekkjer seg heilt innover til Larsnes og Breivika. Her er eit rikt planteliv pga den kalkrike jorda. 

Dersom ein går opp til øverste nivået finn ein stien som går over Voksehaugen, ein fin liten tur i gammal bjørkeskog og med fin utsikt til alle kantar. Stien går ned igjen på sørsida, derifrå går ein vegen tilbake til ferjekaia.

Halvvegs mellom ferjekaia og kalkbruddet går ein forbi gamleposten til høgre og gamleskulen til venstre. Dette er no ein del av Voksa Kultursenter som held på å pusse opp dei gamle husa og skal drive kulturverksemd her.