Homborset - Vadstein via Hornet

Ein flott rundtur der du er innom Homborsetsætra og Vadsteinsætra. Høgste punktet på turen er Hornet. Ein litt vekkgøymd topp med flott utsikt!

Frå parkeringsplassen kryssar du E39 og går gjennom grinda. Hugs å late den att etter deg! Geitene kjem ned her når det er tid for melking. Du skal følge "geitevegen". Ta til høgre etter ca. 100 m (følg turpil) og snart er du inne på stien. Store delar av stien er hellelagd og det er stort sett god merking (raude merkepinnar i trea). Når du kjem opp til Homborsetsætra fortsetter du mellom dei to sela. Stien svingar til høgre. Den går først i myrlendt terreng. Her kan stien vere litt utydeleg, men sjå etter merkepinnar i trea/merkestaur. Etterkvart vert det tørrare underlag og då er stien også lettare å sjå. Følg stien til det flatar ut. Då skal du ta av til høgre opp til Hornet. Her er det svak sti og merkestaur som viser vegen. Hornet har ikkje varde, men eit trigonometrisk merkepunkt. Ta gjerne pause her og nyt den flotte utsikta! Frå Hornet går du vidare i austleg retning og ned til ein rygg med tydeleg sti som du skal følge ned til eit lite tjern. Stien er merka med merkestaur/merkepinnar i trea. Stien går vidare opp ein liten bakke og over til Vadsteinsætra. Litt varierande kor tydeleg den er, men følg merking så finn du fram. Frå selet lengst aust på Vadsteinsætra går stien ned til Vadstein. Sikt deg inn mot ei ståande helle så fin du tydeleg sti. Stien ned til Vadstein er nokså bratt nokre stadar, men ikkje vanskeleg å gå. Det er ikkje veldig mange som går her, men stien er tydeleg. Når bregnene og graset er høgt, må du sjå deg ekstra godt for. Også her er merkestaur/merkepinnar i trea. Når du er nesten nede, følger du gjerdet ned til vegen. No er du klar for siste etappe på runda: 600 m langs vegen, så er du tilbake til start.  

Frå Volda sentrum køyrer du E39 i retning Hornindal/Stryn. Ta av til Hjartåbygda like før Hjartåbergtunnelen og parker like etter avkøyringa. Her er det eit teknisk bygg og eit busstopp