Hidsegga frå Hidsneset

Bratt tur med fantastisk utsikt. På toppen av Hidsegga 556 moh. er det plassert ei sikterose som viser kva du ser rundt deg. Turen kan kombinerast med ein fin tur til fyret på Hidsneset.

Ved parkeringa er det plassert info-tavle og skilt. Kryss vegen og start på motbakken. Du kjem fort opp på ein rygg som fører deg vidare oppover mot det bratte partiet. Allereie frå denne ryggen får du god utsikt.  Frå om lag 100 til 250 moh. er det bratt og luftig. I dette området kan det på enkelte plassar vere litt glatt også. Ved om lag 250 moh. kjem du til eit område med fin utsikt og kanskje på tide med ein pust i bakken. Vidare oppover mot toppen er det fin sti, sjølv om det ikkje er så bratt lenger, er det forsatt ein lang motbakke før du kjem til toppen. Om du ønskjer litt utforsking på turen oppover, så er det mogleg å ta ein avstikkar nedober ryggen til Flåtinden. På toppen av Hidsegga er plassert ein stor varde med Sikterose på toppen.