Bakkedalen - Gapahuken på Vikefjellet

Turen frå Bakkedalen til gapahuken på Vikefjellet er ein lettgått tur som passar  for både store og små, med utruleg fin utsikt når ein kjem oppå Vikefjellet. Bjørke Idrettslag har bygt ein flott gapahuk, der det er mogleg å overnatte både i  hengekøyer og med liggeunderlag på 80 cm. breie sengebriskar,

Turen startar ca.100 meter etter vegkrysset og er merka med skilt. Turen er ca. 200-300 meter lenger enn det som står på skiltet. Årsaka til det er omlegging av stien til tørrare terreng etter at skilta vart laga. Litt bratt i starten, men flatar så ut før ein går litt ned att mot Lomsdalen. Etter å ha passert den lisje elva som kjem frå Lomsdalsvatnet, er det litt bratt igjen før det på nytt flatar ut. No får ein ein ei flott utsikt mot indre del av Hjørundfjorden (Storfjorden) og ein går vidare flatt bortover mot gapahuken. Frå gapahuken ser ein både Finnes, Kalnes, Bjørke ,Åkre og delar av Viddal og ein har  eit mektig utsyn mot dei majestetiske fjelltoppane rundt om.

Gapahuken har dører og det er tillaga slik at ein kan overnatte både med og utan hengekøyer.Der er tillaga grillplass med bålpanne og ved finn ein under gapahuken. NB!! Ver forsiktig ved bruk av open eld.

Frå gapahuken kan ei gå vidare oppover mot spektakulære Oddekloven 972 m.o.h  eller ein kan gå bratt sti ned til Bjørke. Sjå omtale annan plass på Morotur.no