Ausa - Syltedalen

Kort og grei tur på grusveg for turgåarar i alle aldrar i vakkert kultur- og naturlandskap i Syltedalen. Turen går opp til turpost som ein finn i enden av vegen. Det står skilt mot Budalen og Syltehornet ved starten av turen.

Turen går forbi den gamle fjellgarden Ausa. Garden er omkransa av eit fint kulturlandskap. Ein kan sjå murar etter utmarksløder og kalvehus når ein går vidare. Øvre Brekke, eller Ausa på folkemunne, er ein fjellgard der fyrste brukaren er oppført på slutten av 1500-talet. Mange slekter har hatt tilhald på garden, og etter ein brann på 1600-talet låg garden øyde i lang tid med berre sporadisk bruk. Men driftige folk bygde oppatt garden på 1800-talet, og sidan var den busett fram til 70-talet. Garden er no restaurert med den største flid, og med dei vakre bygningane som ramme, kan ein gjerne sitje ei stund og kike mot Slåttelida og Furenakkjen og tenkje seg attende i tid.

Etter å ha kome opp til turposten på enden av vegen kan ein eventuelt fortsetje turen vidare. http://morotur.no/Morotur/Turar/Syltedalen-Syltehornet-Ekremsdalen