Vestrefjellet

Ein lett og variert tur, stort sett utan rås. Toppen av Vestrefjellet er eit flatt og fint område med berg og mose. Eit lite vatn ligg like ved. Varde markerer toppen. Frå toppen har du flott utsikt over Storfjorden, Snaufjellet mot nordvest, Høgsvora mot nordaust og Lauparen og Grytavasstind i søraust. Mot sør er det Skorkjene, Midmorgongshornet og Stamneshornet som er nærmast. Vestrefjellet er også eit fint turmål på ski om vinteren.

Du kan enten gå sør for VIPP-hytta og via den øvste hytta på Sollisætra, – eller du kan følgje råsa mot Kvanndalen / Høgsvora til du kjem om lag opp til høgspentlina. Uansett må du så vidare på skrå over myra mot nordvest. Her er det ikkje tydeleg rås, men sikt deg inn mot Heimsteelva vest for Sætrefjellet. Du kjem etterkvart opp i tørrare terreng, skal halde fram vidare mot nordvest og må sjå deg om etter ein plass å krysse elva. Vidare i same retning opp bakkane. Du ser ikkje varden på Vestrefjellet før du er nesten oppe.Turpostkasse med bok til å registrere seg i, finn du ved varden.