Trimløypa i Tafjord

Ein lett tur gjennom gammalt beiteområde og kulturlandskap. Området er variert og ganske kupert med innslag av særleg furu og bjørk og mange til dels store og mosegrodde steinar. 

Ruta startar på framsida av Kraft- og skredsenteret. Følg gangveg som kryssar elva på støypt plate og opp skråninga til Dalevegen. Gå langs bilvegen omlag 200 meter, og ta til venstre inn på sti som du følgjer oppver gjennom skogen langs den tørrlagte Tafjordelva, til du på nytt kryssar Dalevegen.

Stien går i ei bratt skråning opp frå vegen, så vidare gjennom skogen langs ein bekk og mellom mosegrodde steinar, kalla Sessane. Etterkvart opnar terrenget seg litt mot fjorden og mot beiteområde. På denne sløyfa passerer du turkassa som heng på eit tre og eit stidele med skilt til Tafjord. Stien gjennom skogen kan vere utydeleg nokre plassar, men skal vere grei å finne. 

Stien kryssar på nytt ein bilveg, Sjoavegen, og går vidare gjennom skogen til Todarvoll (gamle Tafjord skule), som no er eigd og nytta av lokale bedrifter. Ved ballbingen på skuleplassen finn du ein sti til vegen som heiter Årjuvene, som du følgjer tilbake til Dalevegen. Derifrå tilbake til parkeringsplassen, same rute som ved turstart.

Det er god rås heile vegen, og det er til vanleg greitt å gå i joggesko.

Ta til venstre rett før brua over Storelva (ved Tafjord friluftsbad), og følg vegen oppover langs austsida av elva, skilta til Kraft- og Skredsenteret, 700 meter. Gratis parkering ved Kraft- og skredsenteret.