Storebøra og Lisjebøra rute 15

Storebøra og Lisjebøra ligg på sørsida av Børevatnet og nordsida av fjella stuper rett nedi Børevatnet.Du får den mest spektakulære opplevinga dersom du går opp på austsida av Lisjebøra først, då får du verkeleg sjå kor bratt nordveggen er. Då dette er dei høgste fjella nordapå Syvdseidet er her ei fantastisk utsikt i alle retningar. Trimpost på toppen av Storebøra.

Turen startar på Fiskåbrauta, enklast er det å fylje skiltinga mot Storebøra, dvs du går mot vest opp forbi ei hytte og svingar mot nord opp forbi murane på Blåsenborg, ovapå Blåsenborg er der ein plass der lynet har slått ned 2 gongar dei siste åra, dette området ligg ca 100m vestapå råsa og er merka med eit stort lynskilt, råsa går vidare over myra i retning mot Lisjebøra, etter myra kjem du til eit vegkryss, der fyljer du skiltinga beint fram mot Lisjebøra og kjem opp på austsida og fyljer kanten opp til toppen, vis varsemd, bratt utføre her. Når du er komen opp går du ned på vestsida og kjem inn på råsa som går opp til Storebøra. Frå Storebøra går du råsa tilbake uten å gå om Lisjebøra, når du kjem til vegkrysset der du tok opp til Lisjebøra kan du enten gå råsa nedigjen til Fiskåbrauta eller du kan gå beint fram til ein stor varde og gå ryggen ned til Kvannskaret, når du er komen ned til Kvannskaret tek du til høgre og fyljer råsa forbi Kirkjesteinane ned til Fiskåbrauta, no har du fått ein fin rundtur forma som eit åttetal.