Solemssetra frå Litlvika

Dette turmålet er ei lita naturperle som ligg på ein lun rabb i lia over Hamnesfjorden. Setra ligg berre vel 300 meter over havet, men har likevel ein utsikt som gjer ei bratt li vel verdt å gå. Dette er ein tur som passar som kvardagstrimtur, men også som søndagstur med dei minste. Sjå anna turbeskriving for ein mindre bratt veg til setra!

Parker på merka plass på nersida av vegen i Litlvika. Gå ca. 100 meter vidare utover og ta inn på skogsvegen på øversida av vegen. Herifrå følgjer du skogsvegen oppover lia og til endes. Deretter tek du inn på stien som går vidare heilt fram til seterstølen. Her er det fint å raste på det flotte utsiktspunktet framfor seterskjelet til Oppistua på Solem. Du kan så velje å gå same veg tilbake til Litlvika, eller du kan gå ein rundtur ved å følgje skilting ned til Oppistua Solem og gå tilbake til Litlvika etter bygdevegen.