Rotevatnet rundt - via Skinstøylen

Turen rundt Rotevatnet er ei sentrumsnær og ofte nytta turrunde. Store delar av turen er bilfri grusveg. Det er mange fine plassar der ein kan stoppe for å raste, bade eller berre sitte og nyte naturen. På Botnasanden, i austenden av vatnet, er det langgrunt og fint å bade, særleg for dei små. Turen startar ved badeplassen Årneset

Start ved parkeringsplassen på Årneset: Gå over ei lita bru og inn på ein grusa turveg. Følg denne til neste bru (ca 250 m), ta til venstre rett etter denne brua. Gå forbi Volda stadion på grus- og gangveg langs Rotevatnet. Ved ei grind i austenden, går grusevegen over til asfaltert veg. Følg vegen vidare til du kjem til ei turtavle. Her går det ein veg til høgre opp langs golfbana. Følg denne vegen ca 400 m om du vil ta avstikkaren til Skinstøylen. Etter ei grind skal du gå rett fram i ca 300 m (følg skilt "Botnasætra - gamleråsa"), til du kjem til eit oppdemt vatn. Dette er Skinstøylen, ei lita perle som ikkje så mange kjenner til. 

På Botnavegen frå Vassbotnen og opp til hovudvegen er det asfaltdekke. Her kan vere noko trafikk, men det er gang- og sykkelveg her. Det er også gang- og sykkelveg langs Vikebygdvegen. Ver merksam på store og små stikkvegar frå høgre ned bakken frå Heltnesundet dersom du syklar.

Sjå deg godt føre når du har komt rundt og skal krysse vegen for å gå ned att til Årneset! Her er ikkje gangfelt

Rullestolbrukarar må vere merksame på at deler av turen kan ha stigning over 1:12.

Kode til StikkUt!Vinter finn du på turkassa i austenden av Rotevatnet der asfaltvegen startar.