Roparen (frå Surnadalsøra)

Turmålet Roparen byr på ein flott utsikt og ein rastebenk du kan nyte den frå. Turen er ikkje lang, berre 2,4 km tur-retur, og passeleg for ein liten luftetur på kveldstid, også om ein bur litt unna det som her er startpunkt. Det er ikkje mykje stigning, berre omlag 140 høgdemeter mellom lågaste og høgaste punkt på ruta.

Start på Surnadalsøra der den austre vegen opp mot bedehuset tek av. (Viss du kjem frå Setergarden, har du da berre passert fire hus på øversida av vegen etter at du kjem til sjølve Øra.) Gå oppover denne vegen, men ta av til venstre rett før du kjem fram til bedehuset. Du fortsett da forbi det øvste huset på Øra og skrår deg vidare oppover og utover lia. Ikkje langt oppi lia, rett etter at du har passert Åsbødammen, deler vegen seg igjen. Vegen fortsett framover, men ein tydeleg sti tek av til venstre oppover. Her svingar du oppover og følgjer merka løype mot Roparen. Etter ei stund kjem du opp på ein skogsveg. Her svingar du til venstre. Følj vegen til du tek inn på merka sti ned mot Roparen på nersida av vegen. Dette tek berre nokre få minutt.