Nyseternakken

Du får ei fin fjelloppleving på denne lille toppen. Etter at den første bratta er unnagjort, kjem du til eit trigonometrisk punkt. Her er det flott fugleperspektiv til Nysetra og Fjellstova.Råsa går vidare nordover og flater ut mot toppen der det er god utsikt mot Skorgedalen, Ytstetinden og Sprovstinden.

Følg den private vegen oppgjennom hyttefeltet på Nysetra. Rett før den øvste hytta, ved sidan av to store steinar startar råsa. Du ser henne tydeleg i terrenget frå bilvegen i den siste stigninga i Landedalen vest for Nysætra. Råsa ber tydeleg preg av å vere mykje brukt og sjølv om den eit stykke er noko bratt, er den ikkje vanskeleg å gå.

Aust for E 39, rett overfor Fjellstova ser du murane av den gamle Nyseterstova. Ein privat veg startar nord for desse og går opp mellom hyttene. Parkering ved E 39 - Fjellstova på Ørskogfjellet.