English

Nessætra/Høgestøylen

Volda

Kort om turen

Nessætra eller Høgestøylen, som den også vert kalla, er ei av mange sætrar i Austefjorden. Valborg Hustadnes skriv dette i boka "Sætreliv i Voldafjell": "Høgestøylen er sæter for gardane Nes, Hjellbakkane og Orsneset i Austefjorden. Ho ligg høgt og fritt på nordsida av dalføret. Ikkje mange sætrar har ei utsikt som kan måle seg med den du ser her." I dag står det att tre sel: Orsnesselet, Endreselet og Erkeselet. Det vert sagt om murane på Endre- og Erkesela at dei er så fine at dei burde ha stått attmed kyrkja, så alle kunne få sjå dei. Det er ikkje mange som tek turen opp til Nessætra, men dei seinare åra har stien vorte merka og rydda. Så no er det lett å finne vegen og vel verdt å ta seg ein tur.

Ruteskildring

Start ved E39 der det er skilta til sætra. Du ser skilt og raudemerking ved eit stort tre like ovanfor vegen. Følg raudemerka heilt til topps. Stien er stort sett grei å sjå, men nokre plassar kan han vere litt utydeleg. Då er det berre å sjå seg om etter raudemerking så finn du ruta du skal gå. I starten er det ikkje så kraftig stigning. Midtvegs (N62° 03.995' E6° 21.898') frå omlag 275 m.o.h., stig det nokså bratt oppover lia, før det igjen flatar litt ut etter Holehjellane og opp til sætra.

Tilkomst og parkering

Frå Volda: Køyr E39 (Kvisvegen) mot Stryn. Like etter Damfosstunnelen er det busstopp på kvar side av vegen. Like før desse busstoppa går det ein skogsveg på nordsida/venstresida av vegen. Du finn merking og skilt ved eit stort tre. Parkering: Etter at du har køyrt gjennom Damfosstunnelen, tek du av til Gjersdal. Ta så straks til venstre. Her er det plass til å parkere og det er bilfriveg vidare til turstart, knapt 400 m. NB! Ver varsam når du skal krysse E39!
Fottur
Blå
Lengde
4,85 km tur/retur
Stigning
586 m
Tidsbruk
2 t 30 min
Sesong
Vår, Sommer, Høst
Høyeste punkt
607 moh
Merking
Merket

Løype på kart

Underlag Lengde i km
Sti 4,9

Offentleg transport

Buss mellom Volda og Stryn. http://www.frammr.no

Anna

Du kan gå vidare til m.a. Fyrdsheida og Lisjedalen, eller ta turen opp til Neshornet (1026 moh) . Det er også ein kort og fin tur frå setra og vidare opp til Øyravatnet. Der er det mura opp ei sittegruppe og det er fin utsikt utover fjorden.

Kart

Sunnmørsalpane. norgeskart.no
Køyreskildring
Print ut