Nedre Vassdalsvatnet

Turen, som startar ved Herdalsvatnet, gir raskt fin utsikt over fjord og fjell i fleire retningar. I Vassdalane ligg Vassdalsvatna som byr på fin fjellaure om du har med det rette utstyret. Her kan du også nyte eit uforstyrra kaldt bad, og du kan halde fram turen til fleire fine turmål herifra.Her er sol til langt på kveld både vår, sommar og haust. Fin familietur, med born frå 5-6års alderen. 

Turen startar litt før ein når osen på Herdalsvatnet, parker ved nausta og gå vegen tilbake til du ser skilt og bru over elva. Gå over brua og vidare langsetter elva til du når vatnet. Ved vatnet er det skilta opp til venstre, nordover til Vassdalane. Ei kort og bratt oppstigning på til tider svært våt og glatt rås (NB! Ver varsam!) fører opp til eit flatare område med god utsikt over fjorden og fjella. Herifrå går god rås vidare opp til eit skar/ein liten dal. Ovanfor skoggrensa kan du følgje same veg som til Kallskaregga eit stykke før du tek av bortover til Vassdalane. Råsa er merkt, men ein bør følgje med i terrenget. Ein føl elva det siste stykket opp til det Nedre Vassdalsvatnet.

NB! Turposten ligg 1000 moh. og det kan difor ligge snø her lenge utover våren.

Turen som er skildra her er ein tur-retur-tur til Vassdalane. Fine turar med same oppstigning er Solegga og Kallskaregga. Dersom du vil gå lenger er Tolleknivsegga også eit alternativ. Frå denne toppen kan du halde fram nordover mot Kyrkjefjellet og eventuelt ende opp ved fjorden ved Kvernhusneset, tvers overfor Fjørå/Vika. Overgangstur skildra i boka Opptur Geirangerfjorden. Tolleknivsegga er ei ganske luftig egg, så for dei som ønskjer det, kan toppen også nåast frå nordsida utan å gå over det luftigaste partiet.