Lebergsfjellet

Turen går heile vegen på veg, slakt i starten og brattare på slutten. Først gjennom bjørkeskog, vidare over skoggrensa med utsikt mot vest og etterkvart også nordover. Frå toppen ser du Brustinden, Ystetinden og Sprovstinden på Vestnessida av Ørskogfjellet. I aust ser du m.a. Høgsvora og Giskemonibba. I sør ser du Storfjorden og fjella langs den. 

Start ved bomvegen i Landedalen, merka med skilt. Gå opp langs grusvegen. Etterkvart som du legg myra bak deg, opnar utsikta vestover seg og det vert litt meir stigning. Vegen rundar så tilbake og går vidare i svingar oppover mot toppen. Eit par brattare etappar vert det etterkvart og når du nærmar deg toppen, ser du dei store mastene med tilhøyrande bygningar. På toppen kan du gjere fleire val viss du vil ha ein rundtur: Gå over til Svartløkfjellet, eller gå til Fjellstova. Raude pinnar markerer vegen, men det er ikkje tydeleg sti.