Kornbergveten

Turen går langs austsida av Dalsfjorden og det er flott utsyn til fleire fjordarmar på Søre Sunnmøre. Det er også ein tur med forholdsvis lite stigning, og den passar difor for dei fleste.

Start ved dyrkamark på Folkestadsætra. Følg vegen som går langs gjerdet og vidare skogsvegen til endes. Her finn du stien som går vidare, først over myrlendt område og så på tørt underlag på ryggen heile vegen til Kornbergveten. Det er også nokre myrparti mot slutten, men elles er stien tørr og fin. Undervegs er det eit par småtoppar som gir godt utsyn. På Galten (N62° 07.267' E5° 59.091') stoppar dei fleste for å la seg fotografere på steinen som stikk ut. Vis varsemd her, det er langt ned! Frå Galten ser du turmålet. Følg stien som går langs kanten. På Kornbergveten er der ei hytte som du kan nytte om du vil. Hugs å rydde etter deg og stenge gluggar og døra når du forlet hytta.