Kleivane

Ein enkel tur på bratt bygdeveg. Du går i sørvendt kulturlandskap, før du kjem opp til garden Kleivane med utsikt over Storfjorden, Ørskogvika og Gausneset. Dette er ein tur du kan ta heile året. Garden Kleivane ligg på eit lite platå på sørvestenden av Liafjellet og gir utsikt mot bygdene på sørsida av Storfjorden. Dei største er Ramstaddalen og Søvika og litt lenger vest ser du også dei fråflytta gardane langs Furstranda.

Turen startar ved Europavegen og følgjer bygdevegen i svingar oppover til vegs ende. Frå snuplassen går det rås vidare vestover mot Tøssa. Turpostkassa med bok til å registrere seg i, finn du på ein furulegg 100 m. vest for siste tunet, langs råsa.