Holskarsætra og Daurmålhornet

Turen går i fin gran- og bjørkeskog, og blant blåbærlyng langs ei elv. Kanskje finn du deg ein kulp å bade i? Det er flott utsikt frå toppen til heile Hornindalen. Ruta frå Holskarsætra til Daurmålhornet er ein del av fjelløpet "Hornindal rundt". NB! Stikk UT!-postkassa og koden finn du på hytta Holskarsætra og ikkje på Daurmålhornet

Start ved Taraldset, like aust for ei lita bru over Holskarelva. Her er godt skilta mot Holskarsætra, Daurmålhornet og Gulekoppen. Stien er tydeleg og går på austsida av Holskarelva. Det er jamn stigning opp til omlag 600 høgdemeter. Her flatar det ut til Holskarsætra. Du skal over ei lita elv før du kjem bort til sætra. Her er det skilta vidare. Stien er tydeleg, og den fortsetter langs elva. I 730 meters høgde kjem du til eit stidele der det også er tydeleg skilta kvar du skal (Daurmålhornet/Gulekoppen - N61° 58.505' E6° 38.563'). Ta til venstre over ei elv, slik skiltet viser. Stien er no tidvis noko meir utydeleg vidare mot Daurmålhornet, men følg dei kvite merka så finn du vegen. Dei kvite merka markerer ruta til "Hornindal rundt".