Helgehornet frå Hovdevatnet

Helgehornet ligg i Volda kommune, men undervegs er du innom Ørsta kommune. Dette er eit mykje nytta turmål. Både fordi det er ein tur som passar for dei fleste og på grunn av det flotte og vide utsynet du har under det meste av turen, og ikkje minst på toppen. Det er lett å kjenne igjen Helgehornet fordi den har ei høg mast på toppen.Dei fleste startar turen frå skytebana i Sollidalen. Denne turomtalen har start ved Hovdevatnet. Her er stien litt tørrare.

Gå skogsvegen oppover til endes. Du passerer eit skilt mot Helgehornet. Gå forbi dette. I enden av skogsvegen startar ein tydeleg sti. Etterkvart kjem du inn på stien som dei fleste nyttar, den som kjem frå skytebana i Sollidalen. Det er lett å finne vegen vidare mot toppen, som du no ser på resten av turen.På returen kan du velje ei litt anna rute og kome ned att til skiltet mot Helgehornet som du passerte på veg opp. Når du kjem til stimøtet der du kom inn på hovudstien på veg opp, følger du hovedstien nedover til du kjem til ei lita myr. Rett etter denne, tek du ein sti som går til venstre.