Hallehornet

Hallehornet er ein av fleire turar du kan gå frå Romedalen. Romedalen er omlag 6 km lang og er fantastisk vakker, kanskje den vakraste dalen i Ørsta! Ei fredeleg elv renn gjennom dalen som er omgitt av ville tindar. Frå Hallehornet har du flott utsyn mot m.a. Molladalstindane, Masdalskloven og ikkje minst mot Romedalen. 

Frå parkeringsplassen går stien like nedanfor øvste selet og vidare nokså bratt oppover lia. Det er tydeleg og god sti til du kjem opp på kanten, like før Brillevatnet. Den tydelege stien fører til Molladalen. Du skal sjå etter ein litt utydeleg sti som dreiar til venstre og i retning toppen. Om du ikkje finn stien, er det ikkje noko problem å finne fram. Det er berre å sikte seg inn mot toppen. Frå toppen har du flott utsikt, ta deg tid til å nyte den!