Breidfjellet frå Ulsteindalen

Dette er ein topp med super utsikt; havet i vest, sunnmørsalpar i aust og holmar og øyar i sør. Det er eit lett tilgjengelig turmål som går delvis på veg og delvis på sti.

Start ved kraftverket i Ulsteindalen. Følg vegen opp til Lisjevatnet, ca 1,3 km. Litt bratt i starten, og så flatar det litt ut når ein nærmar seg vatnet. I enden av vegen tek du sti til venstre/mot nord. Det er skilta mot Roppehornet og Breidfjellet. Stien går i eit litt vått terreng, men det er lagt ut ein del plankar og det er også steinar å gå på, så ein blir ikkje så veldig våt på beina, men det er lurt med sko som tåler ein del væte. Ein passerer to hytter undervegs, den eine i eit skogholt like etter start, og den andre oppe ved Kjellstjørna. Når ein kjem opp til dette vatnet, går stien på nordsida av vatnet. I enden av vatnet går ein over ei steinhelle/bru over elva. Her skal du følge stien rett fram opp ein liten bakke. Ta ikkje av til høgre mot hytta. Følg stien vidare mot toppen. Ved 435 moh (N62° 22.972' E5° 52.229') møter du stien som kjem frå Roppehornet. Herifrå og opp til toppen er det jamn stigning.Stien er lett å finne. Den stig litt i starten, flatar litt ut mot Kjellstjørna, og så er det litt brattare siste delen mot toppen.