Aukra kyststi

Dette er ein fin tur på grusa turveg langs havet for deg som ønsker å oppleve kysten på nært hald. God utsikt mot Bjørnsund og Bud. Turen er flott å gå både i ruskever når "bårå" sler opp mot land, og i finever når ein kan sjå sola gå ned i havet (midtsommars). I området rundt kyststien er det mange gravrøyser og ei skyttarstilling frå krigen.

Turen startar ved parkeringsplass i Årgårdsvika. Følg grusvegen nedover mot sjøen. Når vegen deler seg går du rett fram mot venstre ned ein liten bakke. Stien svingar mot høgre når du kjem ned til sjøen. I starten av stien går ein forbi "Næsja" der båten gjekk over til Rindarøya før moloen kom. Stien snor seg gjennom kystlynghei og etterkvart kjem ein til Sandvika, ei lita perle av ei sandstrand. Følg grusa sti til enden, om lag ein km. Det er fleire benkar og benkebord langs vegen. Kyststien endar ved Komedantholmen.