Heimstevatnet frå Valldalssætra

Fin kveldstur frå Valldalssetra. Litt motbakke frå sætra, så slakt innover Fremstebotnen. Det er mogleg å gå vidare til Fremstevatnet og Espedalen, og vidare til Langsætrane i Stordal.

Frå turparkeringa følgjer du vegen vidare eit kort stykke til du kjem til ein skiltstolpe.Ta så til venstre på traktorveg oppover i terrenget, forbi seterevollen og fleire hytter, følg skilting.

Omtrent når du har passert siste hytta går vegen over i sti som du følgjere jamt oppover i terrenget, med elva nede til høgre. Etter omlag 300 høgdemeter opnar terrenget seg, kryss to elver og følg dalen innover. Dette er Fremstebotn. Litt stigning siste stykket opp til Heimstevatnet. 

Følg fv. 63 frå Valldal sentrum, ta til venstre rett før brua på Myklebust, like ved eit oransjefarga hus, og følg vegen til Valldalssetra. Det er fleire sidevegar i starten av vegen; frå hovudvegen går vegen først rett fram ca 100 meter, før den svingar svakt mot venstre. Ta andre veg til høgre, mot nord, i eit kryss ved eit kvitt hus. 

Følg vegen vidare beint oppover mellom jordbæråkrar til du kjem til Myklebust vassverk. Her kan du parkere og gå vidare på grusvegen (2,5 km), eller betale bompengar for å køyre vidare. Parkering på merka p-plass, ei utkøyring/grushole like før du kjem til Valldalssetra. NB! Det er dyr på sætra om sommaren, dei kan vere nærgåande på parkerte køyretøy.