Verahornet

Ein variert tur på god rås. Du går gjennom skog, over små myrar og kjem til slutt over tregrensa før du når toppen av Verahornet med flott utsikt over Sjøholt sentrum og Ørskogvika. Du ser også vestover til øyane nordvest for Ålesund. I sør ser du innover Storfjorden, mot aust ser du toppane på Vaksvikfjellet og Ørskogfjellet og i nord ser du m.a. fjella rundt Skorgedalen. Verahornet er ein avrunda “topp” med gras og berg og er ein populær, sentrumsnær topp som vert mykje brukt som trimmål.

Skilt i starten ved parkeringa. Råsa følgjer skogkanten til venstre for løa. Råsa går vidare litt bratt opp og gjennom ein tett granskog. Vidare gjennom blandingsskog og over små myrar. Råsa er heile vegen tydeleg og du kjem etter kvart over skoggrensa og rundar til slutt eit berg, før du ser det trigonometriske punktet på toppen.