Vardeskaret frå Aldalen

På denne turen får du gå nokså uforstyrra. Det er ikkje veldig mange som går denne turen på beina, men det er ein kjekk tur. Den går i variert terreng og utsikta frå Vardeskaret er flott! Du har flott utsikt både inn Austefjorden og utover mot Volda. Det er ikkje uvanleg å gå vidare over til Volda eller ta turen til Koppefjellet

Start frå parkeringsplassen ved Aldalsstøylen. På oppsida av vegen ser du ei raud stikke. Turen startar her. Det er sti nesten heile vegen til topps. På slutten er den litt utydeleg nokre plassar, men sikt deg inn mot varden når du får auge på den. Ruta er merka med raude merkepinnar/merkepålar. Når du kjem opp til haugen (Nestehaugen) ikkje så lenge etter start, svingar stien svakt mot venstre (N62° 06.429' E6° 12.549'). Etter å ha gått i bjørkeskog kjem du inn i eineskog og etterkvart i ope lende. Du passerer ein kvilestein i olivin, og kjem etterkvart opp til elva. Kryss elva ca. 470 moh (N62° 06.521' E6° 12.057'), og følg elva vidare på høgre sida. Stien går ca. 10-15 m frå elva. Etterkvart kjem du opp i eit område der snøen kan bli liggande ei stund, og stien er difor meir utydeleg. Det er sti og merking som du kan følge, men dersom du ikkje finn sti, siktar du deg rett oppover, og når du ser varden, går du mot denne. Når du kjem opp til varden, følger du stien litt vidare til du kjem til ein ny varde. Her finn du turkasse med bok. Det er mange plassar du kan sitte og nyte den fine utsikta