Breidfjellet frå Ulsteindalen

Dette er ein topp med super utsikt; havet i vest, sunnmørsalpar i aust og holmar og øyar i sør. Det er eit lett tilgjengelig turmål som går delvis på veg og delvis på sti.

Start ved kraftverket i Ulsteindalen. Følg vegen opp til Lisjevatnet, ca 1,3 km. Litt bratt i starten, og så flatar det litt ut når ein nærmar seg vatnet. I enden av vegen tek du sti til venstre/mot nord. Det er skilta mot Roppehornet og Breidfjellet. Stien går i eit litt vått terreng, men det er lagt ut ein del plankar og det er også steinar å gå på, så du treng ikkje bli så veldig våt på beina. Det er likevel lurt med sko som tåler ein del væte. Undervegs passerer du to hytter, den eine i eit skogholt like etter start, og den andre oppe ved Kjellstjørna. Stien på nordsida av Kjellstjørna. I enden av tjørna går ein over ei steinhelle/bru over elva og så stien rett fram opp ein liten bakke. Ta ikkje av til høgre mot hytta. Følg stien vidare mot toppen. Ved 435 moh (N62° 22.972' E5° 52.229') møter du stien som kjem frå Roppehornet. Herifrå og opp til toppen er det jamn stigning.

Ta av frå rv 61 mot Ulsteinvik sentrum. Køyr Sjøgata vestover gjennom sentrum i retning mot Flø. Ta av mot Flø på Fløvegen. Køyr ca 2,5 km. Etter at du har passert Skeide kjem du snart til der du skal ta av. Det ligg eit bedehus på nedsida av vegen. Du skal ta av før du kjem til dette, på første veg til høgre etter Fløvegen 207. Køyr opp Ulsteindalen, litt over 1 km til du kjem til eit kraftverk. Her kan du parkere og her startar turen.